Campaigns

𝗦𝗢𝗟𝗜𝗗𝗔𝗥𝗜𝗧𝗬 𝗦𝗧𝗔𝗧𝗘𝗠𝗘𝗡𝗧 𝗙𝗥𝗢𝗠 𝗔𝗣𝗜𝗧 𝗧𝗔𝗞𝗢

April 25, 2022

Naballigi a pananglagip iti Aldaw Kordilyera. Aldaw dagiti martir a nangilaban ti nagtaudan a daga ken karbengan iti bukod nga Ili. Tinawen nga intay lagipen ti ipupusay iti ama ken dagiti banwar ti Ili a Kordilyera. Iti Abril 24 a tinmatak ti panunot iti tunggal maysa ken aldaw a rimmusing ken linmangto ti laban tapno lapdan iti plano a dam ti karayan Chico iti Bontoc ken Kalinga. Ti panangidaton ni ama Dulag iti biyag na ket kangatoan a sakripisyo para ti Ili ken kadagiti umili.

Ita, kas sublian tayo iti pakaistoryaan ti Kordilyera manipud kadagiti ennem a probinsiya, amin a laban ket sinango dagiti umili. Risiris kontra kadagiti makadadael a proyekto kas iti dadakkel a minas, dadakkel a dams, hydros, geothermals ken daduma pay a klase ti energy projects a mangdadael iti daga, mangpukaw ti pagbiyagan dagiti umili nga agum-uma, agtaltalon, aggargarden ken agkalkalap. Kangrunaan iti panangburak ti kappia dagiti umili ken gapwanan iti panakasina-sina da.

Ti Apayao a naaplagan iti projekto a dams kas ti Gened 1 ken 2(335 mw a nagbalin a 235mw) Sicapo(55mw) ken Madwang(45mw) dams a plano nga ipasdek idiay Kabugao, Apayao ket nagdalan iti nagsasaruno a panakasaur ti nawaya, inmuna, naipakaammo a pammalubos wenno iti FPIC a makuna.

Saan a mailimed ti panangmanipula iti NCIP ti makuna a proseso kundi nagbalin a rangtay tapno mapapaspas kuma iti addang ti tungtongan maipanggep ti Gened dams. Naunday a risiris iti kasapulan ta inggana ti agdama ket madama paylaeng iti panangsango dagiti apektado a komunidad ti makuna a proyekto.

Segun kadagiti umili, nausar iti isyu ti dam iti benneg ti politika ket karkaro a nagedwa iti umili, nausar ti isyu iti dam tapno lipiten dagiti umili kangrunaan kadagiti tungtongan benepisyo, proyekto,panggedan ken pagsayaatan a magapu ti gobyerno. Naunday iti makuna a laban, adda dan dagiti nabannog, adda dan iti tinmalna, addan dan ti mas pinili na a sangwen iti personal a biyag na ngem ti biyag iti Ili ken umili.

Ti saan a panangsardeng ken tuloy-tuloy a panangliplipit kadagiti umili ket nalawag a pananglabsing iti nainsigudan a karbengan ken ti saan a panangmatmat iti bukod a pangngeddeng ti karbengan tao ken karbengan iti nagtaudan a daga.

Nu man pay kasta mapadayawan dagiti umili ti Apayao kangrunaan iti Kabugao iti tuloy-tuloy a panangsango ti laban kontra dams iti tengnga ti panangpadakes, panangbansag kadakwada a kas kameng iti New People's Army ken terorista a grupo a parparbo laeng tapno gibusan ti karbengan ken waya-waya da a mangitandudo ti Ili, biag ken pangkabiyagan da.

Iti tengnga ti implementasyon iti NTF-ELCAC a nangted ti buteng kadagiti daduma ngem tured kadagiti kaadwan ket marikna iti intero a pagilyan.

Ti Kordilyera ket napalalo metlaengen iti kasasaad na gapu ti daytoy a programa, kas iti panangiproyekto ti peke a surrenderees, dumanon makitungtong, operasyon sita, iti dati a tokhang kadagiti aktibista ken abante nga indibidwal, panangbutbuteng a nangriribuk ken nangted trauma kadagiti inosente a sibilyan nga aktibista ken progresibo a grupo ken indibidwal.

Nu manpay kasta saan tayo a lipatan a ti panagserbi iti Ili ken umili ket sisasagana a mangsango ti anya man a klase iti rigat aginggana patay.

"Nu ti pakatayak ket gapu iti panakilaban ko kontra dam, awan ti mabalin ko"

"Nu ipapati da iti dam ket makipinnatay kami ta ti Ili ket nabalor a sagut kadakami dagiti apong mi"

"Nu panggep iti daga, awan napatpateg pay, ada ditoy ti balay mi, ada ditoy ti trabaho mi, ada ditoy iti pamilya mi, ada ditoy ti panggedan mi, sisasagana kami a matay nu iti daga ti madangran"

Dagitoy a sarita ket nagapo a mismo kadagiti umili nga apektado iti dams ti Ili iti Kabugao, Apayao.

Ti nabalor a kuna ti manakem a ni ama Macliing Dulag

" Nu iti biyag ket ag alanganen, anya ti rumbeng nga aramiden? RISIRIS, nu saan ket mailupitlupit iti karbengam a kas tao ket nakarkaro dayta ngem ti ipapatay.

Ngarud iti kumarkaro a kasasaad , umir-irteng kuma ti panagkaykaysa dagiti umili ket ituloy a irupir ti karbengan para iti daga, biyag, salun-at, edukasyon ken pangkabiyagan!

Agbiyag ti aldaw dagiti umili iti Kordilyera!

Agbiyag ti aldaw Kordilyera!