DEKLERASYON TI PANAGKAYKAYSA A MANGSUPYAT KADAGITI PROYEKTO A MAKADADAEL KEN MANGGAMRUD ITI DAGA, BIAG, DAYAW KEN KINABAKNANG
April 27, 2016
Dakami a delegados a timmabuno iti maika tallo pulo ket dua (322nd) a selebrasyon ti Aldaw Kordilyera a naangay ita a petsa ti Abril 24, 2016 ditoy Bulanao Central Elementary School, Bulanao, Tabuk City, Kalinga ket buklen mi ti DEKLERASYON TI PANAGKAYKAYSA A MANGSUPYAT KADAGITI PROYEKTO A MAKADADAEL KEN MANGGAMRUD ITI DAGA, BIAG, DAYAW KEN KINABAKNANG iti ili mi Kalinga.
Yantangay, ti agdama a kasasaad ti probinsya ti Kalinga ket agpangpangta ti nakaru a didigra a mabalin nga ipaay dagiti adu a proyekto a makadadael iti DAGA, BIAG, DAYAW ken KINABAKNANG kas iti MINAS, DAMS, GEOTHERMAL POWER PLANTS ken dadduma pay.
Yantangay, agarup dua nga apagkatlo (2/3) ti kadagaan ti probinsya ket naaplagan iti nadumaduma nga aplikasyon ti panagminas dagiti local ken gangannaet a dadakkel a kompanya ti minas kas iti Makilala Mining Company, Phelp Dodge, Lepanto Mining Company ken dadduma pay. nakaru a didigra iti nalak-am dagiti taga Kalinga nangruna iti Tabuk idi panawen ti operasyon ti Batong-Buhay Gold Mine Incorporation idi tawen 1980’s.
Yantangay, amin dagiti kangrunaan a karayan iti probinsya ket adda dagiti nakaplano a Hydropower Dam Projects kas iti plano ti HEDCOR (Aboitiz) iti karayan Tanudan, PNOC iti karayan Saltan ken Pasil ken dadduma pay. Nalawag iti pakaistoryaan iti Chico Dam project nga adu ti naisakripisyo a biag gapu iti panangsalaknib iti daga a nagtaudan.
Yantangay, agpangpangta a maagaw ti agarup 25,000 ektarya a kadagaan ti munisipyo ti Pasil, Lubuagan ken Tinglayan gapu iti aplikasyon ti Chevron a mangipasdek iti Geothermal power project iti nagbabaetan ti munisipyo ti Pasil, Lubuagan ken Tinglayan.
Yantangay, iti panangisayangkat dagiti gamrud a local ken gangannaet a kompanya ti minas, dams, ken geothermal iti feasibility studies wenno exploration, adu ti malablabsing a karbengan dagiti nainsigudan nga umili. Saan a panangrespeto iti karbengan dagiti umili iti bukod a panangngeddeng ken desisyon ti umili. Adu a pananglimlimo wenno panangallilaw ti isaysayangkat dagitoy a kompanya nga isu ti mangted ti riribuk kadagiti umili.
Ngarud, dakami a timmabuno iti daytoy a maika tallo pulo ket dua (32nd) a selebrasyon ti Aldaw Kordilyera a maangay ita nga aldaw, April 24, 2016 ditoy Bulanao Central Elementary School, Bulanao, Tabuk Kalinga, iyebkas mi ti napigsa ken napinget a panangsupyat mi iti aniaman a proyekto dagiti gamrud a local ken gangannaet a kompanya ti minas, dams ken geothermal ditoy probinsya.
Ngarud, dawaten mi ti suporta ti amin nga umili ti probinsya ti Kalinga ken dagiti nadumaduma a sector ti gimong kas iti sector ti taong simbahan, dagiti mangisursuro (teachers), iti health sector, lawyers, government employees ken dadduma pay.
Ngarud, daytoy a DEKLARASYON TI PANAGKAYKAYSA ket idanun mi kadagiti kompanya ti minas,dams ken geothermal nga adda aplikasyon da ditoy probinsya ken dagiti opisina a maseknan kas iti NCIP, DENR, DAR, DOE, MGB ken ti opisina ti LGUs ti probinsya.
Ngarud, agpirma kami iti daytoy a DEKLERASYON TI PANAGKAYKAYSA kas pammaneknek iti nasinged a panagsupyat mi iti aniaman a proyekto dagiti gamrud a local ken gangannaet a kompanya ti minas, dams ken geothermal ditoy probinsya.