PABLAAK TI CORDILLERA PEOPLE’S ALLIANCE (CPA) – KALINGA CHAPTER ITI PANNAKA-AMBUS DA DR. CHANDU CLAVER KEN TI ASAWANA A NI ALICE OMENGAN CLAVER.

Agarup 6:45 iti agsapa, inambus dagiti nakalugan iti maysa a dark blue ken white a Delica Van ti lugan da Dr. chandu Claver ken ti asawana a ni Alice Omengan Claver a napan nangitulod kadagiti annak da nga agbasbasa iti St. Tonis College, Bulanao, Tabuk. Nairaman ni Janice Ewag, estudyante nga agur-uray ti lugan nga agpa-Dagupan. Naipan dagitoy iti Provincial Hospital ngem natay ni Alice kalpasan ti lima (5) nga oras gapu iti adu a tama ti bala iti ulo, tengnged ken abaga na..

Ti nasao nga ambus ket naaramid iti sango ti pagadalan nga addaan agarup 250 meters ti kaasideg na iti provincial PNP headquarter ken napalikmutan iti police outpost nga agarup 200 meters ti kaasideg da. Segun kadagiti naka-imatang iti pasamak, nagturong iti direksyon ti agpa-Roxas, Isabela ken Tuguegarao, Cagayan ti lugan a nausar iti panag-ambus a sadinno ket adda ti dua (2) inggana tallo a police checkpoints a malabasan sakbay a rumuar dagiti lugan iti probinsya.

Kalpasan ti pasamak, nagsao ti police Kalinga iti DZRK wenno Radyo ng Bayan Kalinga ken ti report ti PNP regional director babaen iti saan a tumutop ken panangkillo da kadagiti impormasyon iti usto a kinatao ni Dr. Claver.

Saan a kriminal ni Dr. Claver ken ti pamilya na. Isuna ti umuna ken agdama a Chairperson ti Bayan Muna Kalinga ken agdama a vice chairperson ti Cordillera People’s Alliance (CPA) – Kalinga Chapter a mangitantandudo iti panangsalaknib iti daga a nagtaudan, biag, dayao ken kinabaknang. Si-aammo met ti kaaduan nga umili ti Kalinga a maysa ni Dr. Claver kadagiti nalatak a mangngagas iti probinsya. Umuna a chairperson ti Asosasyon dagiti mangngagas ditoy probinsya wenno Kalinga Medical Society.

Kas pagka-ammo dagiti umili nga ti Kalinga, manipud Pebrero iti daytoy a tawen, adun a sibilyan a taga Kalinga ti awanan asi a napapatay. Kaaduan ket awan pulos ti maitudo nu sinno ti nangpapatay nga inggana kadagitoy. Agpukpukkaw dagiti pamilya ken kabagyan da iti hustisya.

Konkondenaren ti CPA Kalinga dagitoy a pasamak iti pammati na nga iti maysa nga gimong ket addaan naan-anay a hustisya talna ken kapya. Saludsod ti CPA Kalinga nga iti panangiyebkas mo kadi iti kalintegam ken panag-miembrom iti Bayan Muna Party list nga impalubos ti gobierno nasyunal ket isu ti pakatayam? Uray ti maduktalan iti ania man a kangatuan a krimen ket saan a patay a dagus ti kaipanana kas sagudayen ti konstitusyon ti Pilipinas. Dagitoy a pasamak ti mangipakita nga awan pudno a talna.

Mamati ti CPA Kalinga a dagitoy a mapaspasamak ket aplikasyon ti Oplan Bantay Laya ni Presidente Gloria Macapagal Arroyo babaen ti Inter Agency Legal Action Group (IALAG) a nangiyanak iti Asosasyon dagiti Kontra Kumunista iti Kalinga (ASAK) a sadino ket inikkan da ti karbengan a pumatay iti kada lawas ti bulan iti las-ud ti lima a tawen manipud 2002 inggana 2007.

Awisen mi ngarud ti amin a managayat iti Hustisya, kapya ken talna iti ania man a sector ti gimong a taga Kalinga kas kada Chandu ken Alice tapno tumipon iti panangibutaktak ken panangipasardeng iti daytoy a pamaspasamak. Iti probinsya tayo a Kalinga, Kordilyera ken iti kabuklan a Pilipinas

HUSTISYA PARA KENNI ALICE OMENGAN CLAVER !
JUSTICE TO ALL VICTIMS OF POLITICAL KILLINGS!!!
IBASURA TI OPLAN BANTAY LAYA!!!
CONDEMN ALL UNJUST KILLINGS IN KALINGA
IALAG IBASURA!!!

Cordillera People’s Alliance (CPA) - Kalinga Chapter
Tabuk, Kalinga
July 31, 2006